Sharr, 25 tetor 2007 - Asnjëra nga pesë këshilltaret e Kuvendit të Sharrit nuk ka shënuar ndonjë aktivitet, apo edhe diskutuar për ndonjë çështje jetike në Kuvend, në gjashtë muajt e parë të këtij viti. I tërë aktiviteti i femrave këshilltare ka qenë ngritja e dorës në seanca, sa herë që këtë e ka bërë lideri i tyre. Këtë e ka dëshmuar monitorimi i punës së Kuvendit Komunal në periudhën janar-qershor 2007 nga Instituti Demokratik i Kosovës (KDI).
Bazuar në këto rezultate, përfaqësimi i femrës së Sharrit në Kuvend mbetet të konsiderohet vetëm si dekor, ose vetëm për ta kënaqur kriterin që kërkohet me ligj, që femra të jetë pjesëmarrëse me 30% në institucione. Rezultatet e hulumtimit, KDI-ja i ka bërë publike në një konferencë për media, të mërkurën, duke prezantuar fletënotimin e punës së 21 këshilltarëve të Kuvendit Komunal të Sharrit. Sipas koordinatorit të KDI-së në Sharr, Driton Çengaj, vlerësimi është bërë gjatë përcjelljes së punës së këshilltarëve në pesë seanca plenare. "Përmes këtij publikimi ne synojmë t'i informojmë qytetarët në mënyrë objektive mbi punën dhe angazhimet e të zgjedhurve të tyre, si dhe përfaqësimin e interesave të tyre në agjendat institucionale. Ky fletënotim dhe publikimi i tij në kohën e zgjedhjeve, u shërben qytetarëve që të reflektojnë në lidhje me preferencat e tyre votuese, si pasqyrim i punës së zyrtarëve të zgjedhur", tha Çengaj, sipas të cilit komponentët që janë subjekt i "notimit" të këshilltarëve komunalë dhe subjekteve politike, janë pjesëmarrja e tyre në seanca, pjesëmarrja në diskutime, inicimi i çështjeve me interes për qytetarët, propozimi i amendamenteve dhe thirrja në interpelancë.Në bazë të raportit të KDI-së, në Kuvendin Komunal të Sharrit mesatarja më e lartë në përfshirjen e këshilltarëve në diskutime ka qenë 24 për qind. Nga 21 këshilltarë 14 prej tyre, ose 66.7 për qind, kanë ngritur për diskutim ndonjë çështje me interes të përgjithshëm, kurse vetëm një këshilltar ka bërë një propozim amendamenti.
Sipas KDI-së, gjatë periudhës janar-qershor të këtij viti, nga pesë seancat e monitoruara, nuk është regjistruar asnjë rast interpelance të Ekzekutivit para këshilltarëve, ndërkohë që vetëm dhjetë këshilltarë kanë parashtruar, së paku një pyetje direkte ose me shkrim. Koordinatori Driton Çengaj tha se vlerësimet në fletënotim janë të bazuara në informata publike dhe faktike, të marra nga vëzhgimi i drejtpërdrejtë i seancave të KK-së dhe nga takimet me zyrtarët komunalë. "Vlerësimet janë tejet të sakta dhe kjo do t'u shërbejë votuesve për zgjedhjet e nëntorit. Qytetarët e Sharrit tani kanë një pasqyrë ekzakte për të përzgjedhurit e tyre", tha Çengaj.
Vlen të theksohet se rezultate më të kënaqshme në punën e KK-së, sipas KDI-së, kanë shënuar vetëm shefat e grupeve parlamentare, ose liderët partiakë. /b. beqaj
